Mark:16:15-18
INTRODUCTION
Potang talagang desididu nakang gawan me ing metung a bage, sabyan mu Sugud! Potang makasadya na ang pamangan a tau, sabyan na ning miglutu, Sugud! Inyang ikit neng Doming y Kuring, leko na ing kayang panga-torpi, at sinabi ka king kayang sarili: Sugud! Sugud – buri nang sabyan, sige pin sulungan me, sige pin balausnan me! E ka mumurung, e ka mamatras! Sugud!
GOSPEL
King ebanghelyong mipasyag ngening aldo iti, ita mu naman yang yuyutus nang Jesus karing keyang alagad – Sugud! Sugud, at ipanaral ye ing mayap a balita! Sugud! Sulung, e ko mumurung! Ngana mo waring sasabing Jesus karing alagad na, “Aku ing kekayu mantabe, aku ing kekayung kayabe.” Ita pin yang payabut na ning kekatamung ebanghelyu ngening aldo iti:
PUNTU: King balang Kristianu, ini ing tubud: Sugud!
Ngening aldo iti, pagmasusyan taya ing panga-konverti nang San Pablo. Nanung gewa nang Apung Ambu, kaybat nang me-konverting Kristiyanu? King bie na, ala yang patugut susugud karing miyayaliwang siyudad ning Imperyo ning Roma, ban ipanaral ing Mayap a Balita, antimo ing yuyutus at tutubud nang Jesus king ebangelyu.
Nung makananu kang San Pablo, makanyan mu naman king balang Kristiyanu. Kekatamu ngan, ini ing tubud: Sugud!
King pamaglingap karing masakit – Sugud!
King pamipakan karing danupan – Sugud!
King pamipaniblas karing lubas – Sugud!
King pamamisita karing makasukul – Sugud!
King pamanyaup karing kalulu – Sugud!
King pamanurung ustung ugali karing kayanakan – Sugud!
King pamantabe karing mibabayatnan – Sugud!
Ing Mayap a Balita, ipayabut ta ya sana karing aliwa. Itamung Kristianu, keni tamu mibuklud-buklud, kaniting metung a tubud – Sugud! Amen.
Walang komento:
Mag-post ng isang Komento